कागदी नावा

कागदी नावा करोनी एक एकामागुनी

वाहत्या पाण्यात देतो मी मजेने सोडुनी

नाव माझे, गाव माझे माझिया नावांवरी

मी लिहीतो शाइने काळ्या नि मोठया अक्षरी

वाहुनी जातील नावा दूर त्या बेटावरी

वाटते, वाचील माझे नाव की कोणीतरी

सोडितो नावा भरोनी शुभ्र जाईची फुले

जायची काळ्या प्रदेशा ही प्रकाशाची मुले

पाहता ही मौज जाते दृष्टि आकाशाकडे

चालती नावा ढगांच्या पांढरी ज्यांची शिडे

माझिया नावांसवे की लावण्याला शर्यत

कोण माझा सौंगडी तेथूनि नावा सोडित ?

झाकुनीबाहूत डोके सांजवेळी झोपतो

तारकागंगेत नावा पोहताना पाहतो

स्वप्नपुष्पांच्या भरोनी टोपल्या नावांतुनी

चालल्या मारीत वल्ही काय निद्रायक्षिणी ?


कवी - ग. ह. पाटील
कवितासंग्रहलिंबोळ्या

कोणत्याही टिप्पण्‍या नाहीत:

टिप्पणी पोस्ट करा