सिनेमा नटाप्रत

चित्रपटिंच्या हे कुशल नटश्रेष्ठा,
        नावलौकिक ऐकला तुझा मोठा;
वृत्तपत्री झळकती तुझे फोटो,
       स्तुतिस्तोत्रे गातसे तुझी जो तो !

म्हणति तुजला 'रूल्डाँफ' कुणी 'चँनी'
         कुणी 'डग्लस' वा काही तसे कोणी
(बोध त्याचा काही न मला होई,
        गम्य, का की, मज त्यातले न काही!)

परी पाहुनि तुज एक मनी शंका
       सहज आली-ती सरळ विचारू का?
'गालदाढी अन् लांबलचक केस
       बोल दोस्ता, कासया राखिलेस?'


कवी - केशवकुमार
कवितासंग्रह - झेंडूचीं फुलें