जय जय महाराष्ट्र माझा, गर्जा महाराष्ट्र माझा
रेवा वरदा, कृष्ण कोयना, भद्रा गोदावरी
एकपणाचे भरती पाणी मातीच्या घागरी
भीमथडीच्या तट्टांना या यमुनेचे पाणी पाजा
जय जय महाराष्ट्र माझा ...
भीती न आम्हा तुझी मुळी ही गडगडणार्या नभा
अस्मानाच्या सुलतानीला जवाब देती जीभा
सह्याद्रीचा सिंह गर्जतो, शिवशंभू राजा
दरीदरीतून नाद गुंजला महाराष्ट्र माझा
काळ्या छातीवरी कोरली अभिमानाची लेणी
पोलादी मनगटे खेळती खेळ जीवघेणी
दारिद्र्याच्या उन्हात शिजला, निढ़ळाच्या घामाने भिजला
देशगौरवासाठी झिजला
दिल्लीचेही तख्त राखितो, महाराष्ट्र माझा
कवी - राजा बढे * संगीतकार - श्रीनिवास खळे
* मूळ गायक -शाहीर साबळे व समूह
बहु असोत सुंदर संपन्न की महा ।
प्रिय अमुचा एक महाराष्ट्र देश हा ॥ धृ ॥
गगनभेदी गिरिविण अणू न च जिथे उणे
आकांक्षापुढती जिथे गगन ठेंगणे
अटकेवर जेथील तुरंगी जल पिणे
तेथ अडे काय जलाशया ना दावीणे
पौरुष्यासी अटक गमे जेथ दुःसहा ॥ १ ॥
विलम वैराग्य एक जागी नारती ??
जरी पटका भगवा झेंडाही डोलती
धर्म राजकारण एक समवेत चालती
शक्ति युक्ति एकवटुनी कार्य साधती
पसरे या कीर्ति अशी विस्मया वहा ॥ २ ॥
गीत मराठ्यांचे श्रवणी , मुखी असो
स्फूर्ति रिती धृति ही देत अंतरी ठसो
वचनी लेखनी ही मराठी गिरा दिसो
सतत महाराष्ट्र धर्म मर्म मनी वसो
देह पडॊ सकारणी ही असे स्पृहा ॥ ३ ॥
कवि - श्रीपाद कृष्ण कोल्हटकर
संगीत - शंकरराव व्यास
मूळ गायक - ललिता फडके, व्ही. जी. भाटकर
महाराष्ट्र जय महाराष्ट्र जय , जय जय राष्ट्र महान
महाराष्ट्र जय महाराष्ट्र जय , माझे राष्ट्र महान
कोटी कोटी प्राणांत उसळतो एक तुझा अभिमान
बलिदाने इतिहास रंगला तुझाच पानोपान
तूच ठेविले स्वातंत्र्याचे फडकत उंच निशाण
तू संतांची , मतिमंतांची , बलवंतांची खाण
तूच ठेविला कर्मयोगमय जागृत यज्ञ महान मातीच्या चित्रात ओतले विजयवंत तू प्राण
मराठमोळी वाणी वर्णी वेदांताचे ज्ञान
पंढरीत नांदले अखंडित भक्तीचे जयगान
ब्रीद न सुटले झुंझारांचे रणी होता निर्वाण
वज्रापुढती अभंग ठरले तुझेच ना पाषाण !
काळालाही जिंकून गेले इथले प्रज्ञावान
मानवतेचे समतेचे तू एकच आशास्थान
पराक्रमावर तुझ्या विसंबे अखंड हिंदुस्थान
* कवी - चकोर आजगावकर
* संगीतकार - श्रीनिवास खळे
* मूळ गायक -शाहीर साबळे व समूह
मंगल देशा, पवित्रा देशा, महाराष्ट्र देशा
प्रणाम घ्यावा माझा हा श्रीमहाराष्ट्र देशा
राकट देशा, कणखर देशा, दगडांच्या देशा
नाजुक देशा, कोमल देशा, फुलांच्याहि देशा
अंजन कांचन करवंदीच्या काटेरी देशा
बकुलफुलांच्या प्राजक्तीच्या दळदारी देशा
भावभक्तिच्या देशा आणिक बुद्धीच्या देशा
शाहीरांच्या देशा कर्त्या मर्दांच्या देशा
ध्येय जे तुझ्या अंतरी, निशाणावरी, नाचते करी;
जोडी इह पर लोकांसी, व्यवहारा परमार्थासी,
वैभवासि, वैराग्यासी
जरिपटक्यासह भगव्या झेंड्याच्या एकचि देशा
प्रणाम घ्यावा माझा हा श्रीमहाराष्ट्र देशा ॥१॥
अपार सिंधुच्या भव्य बांधवा, महाराष्ट्र देशा
सह्याद्रीच्या सख्या, जिवलगा, महाराष्ट्र देशा
पाषाणाच्या देही वरिसी तू हिरव्या वेषा
गोदा, कृष्णा, भीमा तुझिया ललाटिंच्या रेषा
तुझिया देही करी प्रतिष्ठा प्रथम प्राणांची
मंगल वसती जनस्थानिंची श्रीरघुनाथांची
ध्येय जे तुझ्या अंतरी ..... ॥२॥
* कवी -गोविंदाग्रज * संगीतकार - वसंत देसाई * मूळ गायक - जयवंत कुलकर्णी व समूह
मराठीची गौरवगाथा
परभाषेतहि व्हा पारंगत ज्ञानसाधना करा, तरी
मायमराठी मरते इकडे परकीचे पद चेपू नका
भाषा मरता देशही मरतो संस्कृतिचाही दिवा विझे
गुलामभाषिक होऊनि अपुल्या प्रगतीचे शिर कापु नका
कवि कुसुमाग्रज ( स्वातंत्र्यदेवीची विनवणी )
नको पप्पा - मम्मी आई - बाबा म्हणा
वात्सल्याच्या खुणा शब्दोशब्दी
धन्यवाद म्हणा नको थँक्यू थँक्यू
थोडे थोडे रांगू मराठीत
कवि किशोर पाठक - प्रकाशनविश्व २००१
जैसी हरळांमाजीं रत्नकिळा । कीं रत्नांमाजीं हिरा निळा ।
तैसी भाषांमाजीं चोखळा । भाषा मराठी ।।१।।
जैसी पुष्पांमाजीं पुष्पमोगरी । कीं परिमळांमाजीं कस्तुरी।
तैसी भाषांमाजी साजिरी। मराठिया ।।२।।
पखियांमध्ये मयूरू । रूखियांमध्ये कल्पतरू ।
भाषांमध्ये मानू थोरू । मराठियेसी ।। ३।।
- फादर स्टीफन्स
रत्नजडित अभंग । ओवी अमृताची सखी ।
चारी वर्णातून फिरे । सरस्वतीची पालखी ।।
कवि कुसुमाग्रज (मराठी माती)
आम्हा घरी धन शब्दांचीच रत्ने, शब्दांचीच वस्त्रे यत्न करू ।
शब्दचि अमुच्या जीवाचे जीवन, शब्दे वाटू धन जनलोका ।।
तुका म्हणे पहा शब्दचि हा देव, शब्देचि गौरव पूजा करू ।।
- संत तुकाराम
जगामाजि भाषा अनेका अनेक
परिश्रेष्ठ ती मातृभाषा असे
तिचा मान सन्मान वा स्थान घेण्या
जगी या कुणी अन्य भाषा नसे
तशातून शास्त्रे कला ज्ञानपूर्णा
महाशक्तिशाली मराठी असे
शिकाया जगाची कुणी अन्य भाषा
गणा मातृभाषाच किल्ली असे ।।..।।
मराठी असे आमुची मायबोली,
तिला राज्य का? विश्वभाषा करु
जगातील विद्या तशी सर्व शास्त्रे
तिच्यामाजि आणोन आम्ही भरु
पुन्हा पेटवू स्वाभिमानास आम्ही
पुन्हा एकदा शौर्य धैर्या धरुं
मराठीस तारु, स्वदेशास तारु
सुखी विश्व होईल ऐसे करु ।।..।।
- प्र. ग. सहस्त्रबुध्दे
शौर्याची तव परंपरा
- द. ना. गव्हाणकर
शौर्याची तव परंपरा! महाराष्ट्रा वळुनि बघ जरा
शिवबाच्या कीर्तीचे झडति चौघडे
गडकिल्ले अजुनीही गाति पवाडे
दरि खोरे वीरकथा सांगे पठारा॥
सिंहगडीं अमरपदीं ताना पहुडला
अन्याया तुडवित संताजि दौडला
आंग्रयांनी जागविले अरबी सागरा ॥
चांदबिबी, लक्ष्मीनें खड्ग पेललें
तात्यानें समरावर वार झेलले
उमाजीनें डोंगरांत केला पुकारा ॥
वासुदेव ङ्गडक्यांना ङ्गांस
लोकमान्य टिळकांचे सिंह गर्जले
सत्यास्तव ज्योतिबांनी केले संगरा ॥
परशराम, बाबु गेनू, वीर कोतवाल
छातीवर गोळी झेली हसत बिंदुबाळ
बेचाळीस क्रांतीचा शूर सातारा ॥
लाखोंनी देशास्तव अर्पियले प्राण
गाति कोयना, कृष्णा त्यांचें कीर्तिगान
सह्याद्री अभिमानें ङ्गुलवि पिसारा ॥
संयुक्त महाराष्ट्र येतसे पहा
- द. ना. गव्हाणकर
संयुक्त-महाराष्ट्र येतसे पहा
कोटि कर उंचावुनी उभे रहा ॥
अरबि सिंधुच्या तिरीं
सह्यगिरीच्या शिरीं
मराठीची ही नगरी
गोदा, कृष्णा वहाती सुवर्ण-प्रवाहा॥
समतेचे छत्र शिरीं
सौख्यचा दंड करी
आणायास भूवरी
माझा महाराष्ट्र गर्जा जयघोष हा॥
उठवा गिरीकंदरा
जागवा चरां चरां
कांपवा दिगंतरां
खवळोनी सिंधुपरी रूप घ्या महा॥
मर्हाठे सर्व खडे
वाजवीत चौघडे
ध्वज त्यांचा ङ्गडङ्गडे
उंच जावोनी नभास तो भिडे पहा॥
