प्रेमळ तो भक्त कुंभार गोरा।।१।।

असे घराश़मी करीत व्यवहार

न पडे विसर विठोबाचा ।।२।।

कालवुनी माती तुडवीत गोरा।

आठवीत वरा रखुमाईच्या।।३।।

प्रेमे अंगी असे झाकुनी नयन

करीत भजन विठोबाचे ।।४।।

 

- संत नामदेव

चोखा माझा जीव चोखा माझा भाव।
कुलधर्म देव चोखा माझा।।

काय त्याची भक्ति काय त्याची शक्ति।
मोही आलो व्यक्ति तयासाठी।।

माझ्या चोखियाचे करिती जे ध्यान।
तया कधी विघ्न पडो नदी।।

नामदेवे अस्थि आणिल्या पारखोनी।
घेत चक्रपाणी पितांबर।।


   -  संत नामदेव

आधी रचिली पंढरी

आधी रचिली पंढरी ।
मग वैकुंठ नगरी ॥१॥

जेव्हा नव्हते चराचर ।
तेव्हा होते पंढरपूर ॥२॥


जेव्हा नव्हती गोदा गंगा ।
तेव्हा होती चंद्रभागा ॥३॥

चंद्रभागेचे तटी ।
धन्य पंढरी गोमटी ॥४॥

नासिलीया भूमंडळ ।
उरे पंढरीमंडळ ॥५॥

असे सुदर्शनावरी ।
म्हणुनी अविनाशी पंढरी ॥६॥

नामा म्हणे बा श्रीहरी ।
आम्ही नाचु पंढरपुरी ॥७॥


रचना - संत नामदेव महाराज
संगीत - अण्णा जोशी
स्वर - मन्ना डे 

रुपे श्यामसुंदर

रुपे श्यामसुंदर निलोत्पल गाभा ।
सखीये स्वप्नी शोभा देखियेला ॥१॥

शंखचक्र गदा शोभती चहुकरी ।
सखीये गरुडावरी देखियेला ॥२॥

पितांबर कटी दिव्य चंदन उटी ।
सखीये जगजेठी देखियेला ॥३॥

विचारता मानसी नये जो व्यक्तीसी ।
नामा केशवेसी लुब्धोनी गेला ॥४॥


रचना – संत नामदेव
संगीत – प्रभाकर पंडित
स्वर – सुरेश वाडकर

प्रेमपिसें भरलें अंगीं

प्रेमपिसें भरलें अंगीं ।
गीतेसंगें नाचों रंगीं ॥१॥

कोणे वेळे काय गाणें ।
हे तों भगवंता मी नेंणे ॥२॥

वारा वाजे भलतया ।
तैसी माझी रंग छाया ॥३॥

टाळमृदंग दक्षिणेकडे ।
आम्ही जातो पश्चिमेकडे ॥४॥

बोले बाळक बोबडे ।
तरी ते जननीये आवडे ॥५॥

नामा म्हणे गा केशवा ।
जन्मोजन्मीं देईं सेवा ॥६॥


रचना  –  संत नामदेव
संगीत – वसंत देसाई
स्वर   – वाणी जयराम

संत नामदेव आरती

जय जयाजी भक्तरायां | जिवलग नामया |
आरती ओवाळिता | चित्त पालटे काया ||धृ.||

जन्मता पांडुरंगे | जिव्हेवरी लिहिले |
शतकोटी अभंग| प्रमाण कवित्व रचिले ||१||

घ्यावया भक्तिसुख | पांडुरंगे अवतार |
धरुनियां तीर्थमिषें | केला जगाचा उद्धार || जय.||२||

प्रत्यक्ष प्रचीती हे | वाळवंट परिस केला |
हारपली विषमता | द्दैतबुद्धी निरसली || जय.||३||

समाधि माहाद्वारी श्रीविठ्ठलचरणी |
आरती ओवाळितो | परिसा कर जोडूनी | जय जयाजी ||४||